Unha historia trepidante sobre os estereotipos de xénero.
A medio camiño entre a novela e a obra de teatro (a trama arrinca inspirándose na secuenciación habitual dunha das súas formas máis antigas, a traxedia); o alumnado de 3ºC dun instituto, o equipo docente e un puñado de coñecidos deuses pertencentes ao imaxinario grego configuran a nómina de personaxes que transitan por esta acertada proposta. Tommaso, Giovanni e outros mozos manteñen unha actitude un tanto machista e prepotente, as mozas, sobre todo Sara, están cansadas das súas bromas, e algunhas profesoras, como a recentemente incorporada señorita Frigerio, advirten que é necesario intervir, sobre todo tras escoitar as respostas deses mozos ao sondar a posibilidade de celebrar unha función con motivo do Nadal. Tras numerosas suxestións, boa parte dos asistentes acordan que hai que facer algo "rompedor". Por que non levar ás táboas unha interpretación que, ao mesmo tempo, axude a modificar actitudes antes de que sexa demasiado tarde? Lorenza Bernardi dá un paso máis aló na trama, introducindo un elemento fantástico que contribúe a incrementar os niveis de empatía, tan necesaria a calquera idade. As reflexións que se realizan en clase poden servir como detonante para xerar un debate, ao esbozar estereotipos de xénero e actitudes aceptadas ao longo do tempo que poden desmontarse cunha análise pausada.