Na sobrecuberta : Premio Booker 2002

Pi Pattel é un mozo que vive en Pondicherry, India, onde o seu pai é o propietario e encargado do zoolóxico da cidade. Aos dezaseis anos, a súa familia decide emigrar a Canadá e procurarse unha vida mellor coa venda dos animais. Tras complexos trámites, os Pattel inician unha travesía que se verá truncada pola traxedia: unha terrible tormenta fai naufragar o barco no que viaxaban.No inmenso océano Pacífico, unha solitaria barcaza de salvamento continúa flotando á deriva con cinco tripulantes: Pi, unha hiena, un orangután, unha cebra ferida e un enorme macho de tigre de Bengala. Con intelixencia, atrevemento e, obviamente, medo, Pi terá que botar man do enxeño para manterse a salvo mentres os animais tratan de ocupar o seu posto na cadea alimentaria e, ao cabo, terá que defender o seu liderado fronte ao único que, previsiblemente, quedará vivo.